Warar soo baxaya ayaa sheegaya in Dowladda Federaalka Soomaaliya ay aqbashay in madaxweyneyaasha maamul-goboleedyada Jubbaland iyo Puntland ay caasimadda yimaadaan iyagoo wata ilaaladooda iyo hubkooda culus.
Odayaal dhaqan iyo Beesha caalamka ayaa la sheegay in caddaadis xooggan ay saareen madaxda DFS, taasi ayaa keentay in dowladda ay ogolaato in Deni iyo Axmed Madoobe ay hubkooda kala soo degaan garoonka diyaaradaha Aadan Cadde ee Muqdisho.
Madaxdan oo la filayay inay maanta soo gaaraan Muqdisho ayaa hakiyay safarkooda sababo la xiriira arrimo amni, balse wararka hadda la helayo ayaa tilmaamaya in maalmaha soo socda ay imaan doonaan, si ay uga qayb galaan gogosha wadatashiga qaran ee uu fidiyay Madaxweynaha Soomaaliya Xasan Sheekh Maxamuud.
Dhanka kale, waxaa socda dadaallo lagu dejinayo xiisadda siyaasadeed, kuwaas oo ay hormuud ka yihiin odayaasha dhaqanka, si loo helo xal waara oo lagu dhammeeyo khilaafka taagan.
Sidoo kale, Madaxweynaha Soomaaliya ayaa ergo ahaan u soo dirsaday Ugaas Maxamuud Cali Ugaas, ganacsade Mursal Kadiye iyo xubno kale, kuwaas oo wadahadallo la yeeshay dhinacyada siyaasadda, oo ay ka mid yihiin Madaxweynihii hore Sheekh Shariif Sheekh Axmed.
Ergadaasi ayaa farriin ka waday madaxtooyada Soomaaliya oo muujineysa in dowladda federaalka ay ka garaawsatay khaladkii ka dhashay tallaabadii hore loogu celiyay diyaarado siday wafdiyo ka socday Jubbaland iyo Puntland.
Tallaabadan ayaa loo arkaa mid lagu dejinayo xiisaddii siyaasadeed ee soo xoogeysanaysay, islamarkaana lagu xoojinayo wada-hadalka iyo is-afgaradka u dhexeeya Dowladda Federaalka iyo maamul-goboleedyada dalka.
