Golaha Wasiirrada Dowlad Goboleedka Jubbaland ayaa maanta si adag u cambaareeyay shirkii Golaha Wadatashiga Qaran ee lagu soo gabagabeeyay magaalada Muqdisho, iyagoo ku tilmaamay nuxurka iyo qodobadii kasoo baxay shirkaasi “mid aan waafaqsanayn Dastuurka KMG ah iyo shuruucda dalka”.
“Go’aannadaasi waxay wiiqayaan geeddi-socodka federaalka iyo wadajirka qaranka Soomaaliyeed,” ayaa lagu yiri war-saxaafadeedka kasoo baxay kulanka Golaha Wasiirrada.
Ugu dambeyn, Jubbaland waxay ugu baaqday dowladda Federaalka inay ilaaliso Dastuurka KMG ah iyo habraacyada sharciyeed ee lagu dhisayo maamulada, iyadoo laga fogaanayo tallaabo kasta oo dhaawici karta midnimada dalka.
Golaha Wadatashiga Qaran ayaa habeenkii xalay ku baaqay in Wasaaradda Arrimaha Gudaha ee Federaalka ay soo saarto talo sharci ah oo lagu wajaho xaaladda Jubbaland, si loo helo dowlad-goboleed leh sharciyad buuxda.
Jubbaland ayaa horey u shaacisay inay wadashaqeynta kala laabatay Dowladda Federaalka, iyadoo ku eedeysay in dowladda dhexe ay u shaqeyso si u eg shirkad gaar ah oo ku kooban Gobolka Banaadir.
Madaxweynaha Jubbaland, Axmed Maxamed Islaam (Axmed Madoobe), ayaa isaguna dhankiisa sheegay in go’aan kasta oo kasoo baxa Dowladda Federaalka aanu wax saameyn ah ku yeelan doonin jiritaanka Jubbaland.
