Guddoomiyihii hore ee gobolka Banaadir, Yuusuf Xuseen Jimcaale (Madaale), ayaa si kulul uga hadlay hadal ka soo yeeray xubno ka tirsan Xisbiga Cadaaladda iyo Wadajirka (JSP), kaas oo lagu sheegay in musharaxa rasmiga ah ee caasimadda uu yahay Muungaab. Madaale ayaa arrintan ku tilmaamay nasiib-darro weyn isla markaana sheegay inay tahay mid aan la aqbali karin.
Gudoomiye Madaale ayaa carbaabay in Xisbiga JSP uu leeyahay nidaam u degsan oo aan qof walba xaq u lahayn inuu si gooni ah u magacaabo musharaxa, isagoo xusay in musharixiinta marka hore ay maraan tartan hoosaad ka hor inta aan lagu dhawaaqin musharax rasmiga ah.
Sidoo kale, Madaale ayaa sheegay in Ku-xigeenka Xoghayaha Guud ee Xisbiga JSP, Xuseen Sheekh Maxamuud, looga baahan yahay inuu cadeeyo cidda ka dambeysay hadalkaas islamarkaana uu raali-gelin ka bixiyo.
Guddoomiyihii hore ee Gobolka Banaadir Madaale ayaa sheegay in Xisbiga Madaxweyne Xasan Sheekh Maxamuud ee JSP uu qarka u saaran yahay inuu burburo.
Gudoomiye Madaale ayaa ugu dambeyn ku adkeystay in nidaamka iyo tartanka gudaha xisbiga la ixtiraamo, isla markaana la joojiyo magacaabista musharixiinta ka hor intaan tartanku dhicin.
