Ciidamada Xoogga Dalka Soomaaliyeed iyo kuwa Daraawiishta Koofur Galbeed ayaa si buuxda ula wareegay amniga Deegaanka Yaaq Bari-Weyne ee hoostaga Degmada Wanla-weyn, kadib howlgallo qorsheysan oo lagu xaqiijinayay amniga iyo fulinta sharciga.
Intii ay howlgalladu socdeen, ciidamada ayaa fasaxay gaadiid fara badan oo muddo afduub ugu haysteen deegaankaas koox hubeysan oo dhowaan maxkamada ciidamada qalabka sida ku xukuntay dil toogasho ah.
Talaabadan ayaa qeyb ka ah dadaallada lagu doonayo in lagu cirib tiro falalka amni-darrada ah ee ka jira gobolka.
Saraakiisha hoggaaminaysa howlgalka ayaa kulan rasmi ah la qaatay odayaasha dhaqanka, culimada iyo waxgaradka deegaanka, iyagoo kala hadlay sidii bulshada looga qeybgelin lahaa soo qabashada ragga ku xukuman dilka, kuwaas oo la rumeysan yahay inay ku dhuumanayaan deegaanada u dhow.
Howlgalka ayaa weli socda, waxaana lagu wadaa in lagu ballaariyo deegaanada kale ee hoos yimaada degmada Wanla-weyn si loo xaqiijiyo ammaanka.
