Kooxda Xamaas ee reer Falastiin ayaa maanta oo Jimce ah shaaca ka qaaday magacyada sedex la hayste oo ay sii deyn doonto maalinta berito ah si ay ugu badalato maxaabiis reer Falastiin ah oo ku jira xabsiyada Israaโiil.
Sedexda la sii deyn doono waxa ku jira nin haysta labada dhalasho ee Maraykanka iyo Israaโiil.
Yarden Bibas, Keith Siegel iyo Ofer Kalderon ayaa berito oo Sabti ah la sii deyn doonaa sida uu sheegay afhayeenka garabka hubeysan ee ururka Xamaas Abu Cubeyda oo qoraal soo dhigay barta Telegram.
Khamiistii Xamaas waxay sii deysay sedex Israaโiiliyiin ah iyo shan u dhashay Thailand halka Israaโiil ay sii deysay 110 maxbuus oo Falastiiniyiin ah.
Heshiiska xabad joojinta ee lagu joojiyay dagaalkii 15-ka bilood socday ayaa dhigayay in lixda todobaad ee ugu horeeya ay falastiiniyiintu sii daayaan 33 la hayste kuwaas oo lagu badalanayo boqollaal maxbuus oo falastiiniyiin ah oo qaarkood ku xukunnaa xabsi daaโin kuna jiray xabsiyada Israaโiil.
15 la hayste oo ay ku jiraan shan shaqaale oo Thailand u dhashay iyo illaa 400 oo maxaabiis falastiiniyiin ah ayaa la is weydaarsaday.
Sedex Israaโiiliyiin ah ayaa Khamiistii lagu badashay 90 maxbuus oo falastiiniyiin ah oo ay ku jiraan 9 xabsi daaโin ku xukunayd iyo 81 xabsiyo dhaadheer ku xukunnaa.
