Iyadoo uu baahay war ku saabsan in xubno dhawaan dowladda Soomaaliya u xulatay in ay ka mid ah noqdaan baarlamaanka dalalka bariga Afrika ay diidday maxkamadda cadaaladda ee dalalkaas oo ku taalla magaalada Caruusha ee dalka Tansaniya, ayaa haddana waxaa soo baxaya war sheegaya in arrintaa aaney jirin balse dacwad laga gudbiyay xubnahaas dib loo dhigay go’aankeeda.
Safiirka Soomaaliya u fadhiya dalka Tansaniya Ilyaas Cali Xasan ayaa xaqiijiyay in warkaasi aanu dhab ahayn. Sidoo kale bartiisa Facebook ayuu ku qoray qoraal sidaan u dhignaa: “Waa waxba kama jiraan warka ah in Maxkamada EACJ ay go’aamisey in dib loo celiyo xubanaha DFS dhowaan soo xushey Baarlamaanka EALA.Maxkamada waxay dib udhigtey keliya waa waqtiga ay soo saareyso go’aanka kama dambeyska ah xukunka dacwada,”.
Siyaasiin iyo xubno ka soo horjeeda hannaanka lagu soo xulay xubnahaas ayaa la sheegay in ay dacwad u gudbiyeen maxkamadda, hase-yeeshee faah-faahin intaas dheer lagama hayo ilaa iyo hadda.
