Wasaaradda Beeraha iyo Waraabka Dowladda Hirshabeelle oo ku howlan sare u qaadista wax-soo-saarka gudaha ayaa maalintii labaad sii wadday qeybinta dawooyinka beeraha, iyada oo taageero muhiim ah gaarsiisay tuulada Kaluundi ee hoos timaada magaalada Jowhar.
Intii uu socday barnaamijkan, ayaa 200 qoys oo beeraley ah lagu wareejiyay dawooyin muhiim u ah kor u qaadista wax-soo-saarka, kuwaas oo ka caawinaya beeraleyda in ay yareeyaan cudurrada dalagyada isla markaana kordhiyaan tayada iyo tirada wax-soo-saarka.
Qaar ka mid ah beeraleyda deegaanka ayaa u mahadceliyay Wasaaradda Beeraha, iyaga oo sheegay in dawooyinkan ay wax weyn ka tari doonaan shaqadooda iyo xilli-soo-saarkooda.
Munaasabadda maanta waxaa Wasiir Ku-xigeenka Wasaaradda Beeraha, Mudane Maxamed Bashiir Qaasim Daqare, ku wehliyay Isku-duwaha Wasaaradda ee Gobolka Shabeellaha Dhexe, Mudane Cabdiraxmaan Faracade.
Wasiir Ku-xigeenku, oo shalay ka bilaabay qeybinta tuulada Banaaneey, ayaa sheegay in barnaamijkan uu sii socon doono maalmaha soo socda, lana gaarsiin doono tuulooyinka kale ee gobolka, si loo xoojiyo wax-soo-saarka gudaha iyo badbaadinta dalagyada beeraleyda Hirshabeelle.
