Wararka laga helayo Gobolka Baay ayaa sheegaya in dhaq-dhaqaaqyo ciidan oo xooggan ay ka socdaan gobolka Bay, kuwaas oo sare u qaaday xiisadda amni ee halkaasi ka jirta.
Ciidamadii taabacsanaa Madaxweynihii hore ee Koofur Galbeed Soomaaliya, Cabdicasiis Xasan Maxamed Laftagareen, ayaa xalay gaaray magaalada Berdaale, kadib markii ay dhaqaaqeen deegaanka Awdiinle.
Sidoo kale, warar dheeraad ah ayaa sheegaya in shalay galab deegaanka Awdiinle ay ka baxeen ciidamo isku magacaabay “xaq u dirir”, kuwaas oo uu hoggaaminayo Xasan Xirkey, islamarkaana xalay gaaray deegaanka Yurkud.
Dhanka kale, ciidamo kale oo ka baxay Awdiinle isla xalay, kana amar qaata saraakiil ay ka mid yihiin General Amiin iyo Taliye Meedeey, ayaa lagu soo waramayaa inay haatan ku sugan yihiin duleedka magaalada Berdaale.
Wararka ayaa sidoo kale intaas ku daraya in ugu yaraan 15 gaari oo ay wateen ciidamo ka tirsan xoogga dalka iyo kuwa maamulka Koofur Galbeed ay ka daba baxeen dhaq-dhaqaaqyadaasi, taasoo muujineysa abaabul ciidan oo ballaaran.
Xiisadda ayaa si gaar ah uga taagan deegaanka Yurkud, halkaas oo si weyn looga cabsi qabo inuu dagaal ka qarxo, maadaama ay ku wajahan yihiin ciidamo kala aragti duwan.
Guud ahaan xaaladda gobolka Bay ayaa lagu tilmaamayaa mid aad u kacsan, iyadoo dadka deegaanka ay muujinayaan cabsi sii kordheysa oo ku saabsan suurtagalnimada isku dhacyo hubeysan oo saameyn kara amniga iyo nolosha shacabka.
