Madaxweynihii hore ee Soomaaliya Maxamed Cabdullaahi Farmaajo ayaa qoraal uu soo saaray kaga hadlay xaaladda siyaasadeed ee dalka, isagoo si buuxda u taageeray baaqii ay hore u jeediyeen Shariif Sheekh Axmed iyo Xasan Sheekh Maxamuud.
Farmaajo ayaa tilmaamay in madashii caleema-saarka Ugaas Cabdirisaaq Ugaas Cabdullaahi Ugaas Xaashi ay ahayd mid si cad u muujisay baahida ay Soomaalidu u qabto midnimo, wadahadal iyo xal nabadeed oo laga gaaro khilaafaadka siyaasadeed ee soo noqnoqday.
Wuxuu carrabka ku adkeeyay muhiimadda ay leeyihiin duubabka dhaqanka Soomaaliyeed, isagoo sheegay in ay door lama huraan ah ka qaadan karaan xal u helidda ismari-waaga siyaasadeed ee dalka, gaar ahaan xilligan xasaasiga ah.
Sidoo kale, Farmaajo ayaa ugu baaqay odayaasha dhaqanka inay u istaagaan gudashada waajibaadkooda taariikhiga ah, isla markaana ay hormuud u noqdaan dadaallada lagu badbaadinayo dalka, si looga fogaado dib u laabasho siyaasadeed iyo khataro keeni kara dagaallo sokeeye.
Wuxuu ugu baaqay madaxda siyaasadda dalkamuxaafid iyo mucaaradba inay siiyaan duubabka dhaqanka kaalinta ay mudan yihiin ee geeddi-socodka dowlad-dhiska, maadaama ay laf-dhabar u ahaayeen aas-aaska nidaamka dowladeed ee Soomaaliya.
