Dowladaha Somalia iyo Burkina Faso ayaa isku raacay in ay xoojiyaan iskaashiga dhinaca amniga iyo la dagaallanka argagixisada, kadib kulan muhiim ah oo ka dhacay magaalada Ouagadougou.
Wasiirka Amniga Gudaha Soomaaliya, Cabdullaahi Sheekh Ismaaciil Fartaag iyo wafdi uu hoggaaminayo ayaa la kulmay Madaxweynaha Burkina Faso, Ibrahim Traoré, iyaga oo ka wada hadlay xoojinta xiriirka labada dowladood, gaar ahaan dhinacyada amniga, tababarrada ciidamada iyo la dagaallanka kooxaha argagixisada.
Wasiir Fartaag ayaa Madaxweynaha Burkina Faso gaarsiiyay farriin rasmi ah oo uu ka siday Madaxweynaha Jamhuuriyadda Federaalka Soomaaliya, Hassan Sheikh Mohamud.
“Waxaan isla garannay muhiimadda ay leedahay xoojinta iskaashiga dhinacyada is-weydaarsiga xogta sirdoonka, tababarrada iyo wada shaqeynta hay’adaha amniga,” ayuu yiri Wasiir Fartaag.
Labada dowladood ayaa sheegay inay wadaagaan caqabado isku mid ah oo ku saabsan la dagaallanka argagixisada, taasoo sababtay in la dardargeliyo wada shaqeynta labada dhinac.
