Waxaa goordhow ka furmaya Jaziira Hotel shir gaar ah oo ay yeelanayaan siyaasiyiinta mucaaradka Soomaaliya, kaas oo lagu wado inay ku shaaciyaan goobaha rasmiga ah ee ay ka dhacayaan bannaanbaxyada ay hore ugu baaqeen.
Shirkan ayaa kusoo aadaya xilli mucaaradka ay wadaan kulamadii ugu dambeeyay iyo abaabullada la xiriira bannaanbaxa la qorsheeyay inuu ka dhaco magaalada Muqdisho.
Wararka ayaa sheegaya in siyaasiyiinta mucaaradka ay ka arrinsanayaan qaabka loo maareynayo isu soo baxa, amniga taageerayaashooda iyo fariimaha siyaasadeed ee lagu gudbinayo bannaanbaxa.
Sidoo kale mucaaradka ayaa shaacinaya degmooyinka ay kala degi doonaan iyo goobaha ay ka dhacayaan Banaanbaxyada.
Dhanka kale, Dowladda Federaalka Soomaaliya ayaa iyaduna kordhisay dhaq-dhaqaaqyada amni ee Muqdisho, iyadoo ciidamo dheeraad ah lagu arkayo waddooyinka waaweyn iyo goobaha muhiimka ah ee magaalada, si looga hortago qalalaase amni ama isku dhac ka dhasha bannaanbaxyada.
Xiisadda siyaasadeed ee u dhexeysa dowladda iyo mucaaradka ayaa maalmihii dambe si weyn uga sii dareysay Muqdisho, iyadoo shacabka ay si dhow ula socdaan xaaladda iyo waxa kasoo bixi kara kulamada socda.
