Madaxweynaha Puntland Siciid Cabdullaahi Deni ayaa caawa ka hadlay shirkii natiijo la’aanta ku soo dhammaaday ee dhexmaray Golaha Mustaqbalka iyo Madaxweyne Xasan Sheekh, kaas oo ay garwadeen ka ahayd Beesha Caalamka, gaar ahaan Mareykanka iyo Ingiriiska.
Madaxweyne Deni ayaa sheegay in Golaha Mustaqbalka ay wax badan ka tanaasuleen, hase ahaatee dhanka madaxweyne Xasan Sheekh ay wax walba ka socon waayeen.
Wuxuu xusay in safiirada Mareykanka iyo Ingiriiska ay maanta shirka oo socda isaga baxeen, markii ay arkeen in aan wax natiijo ah ka soo baxayn .
Madaxweynaha Puntland wuxuu ku eedeeyay madaxweyne Xasan Sheekh nin dalka burbur u horseedayo oo ay tahay in gacanta laga qabto.
Madaxweyne Deni ayaa hadalkan ka jeediyay kulan ay Golaha Mustaqbalka qabteen oo lagu xusayay munaasabadda maalinta dhallinyarada Soomaaliyeed ee 15-ka May, kaas oo ka dhacay Hotel Jazeera ee Muqdisho.
