Urur Goboleedka IGAD ayaa ku baaqay in la sii wado wadahadallada siyaasadeed ee Soomaaliya, kadib markii ay natiijo la’aan kusoo dhammaadeen kulamadii Muqdisho ku dhex maray Dowladda Federaalka Soomaaliya iyo mucaaradka.
Warsaxaafadeed kasoo baxay Xoghaynta IGAD oo xarunteedu tahay magaalada Djibouti ayaa lagu sheegay in ururku uu si dhow ula socday wadatashiyadii dhacay intii u dhexeysay 13 illaa 15-ka May 2026.
IGAD ayaa soo dhaweysay wada-hadallada tooska ah ee dhex maray dhinacyada siyaasadda Soomaaliya, waxayna ku boorrisay inay sii wadaan wada-xaajoodyada si xal looga gaaro arrimaha weli taagan, iyadoo loo marayo hannaan dhisaya kalsooni iyo wadajir.
Ururku wuxuu carrabka ku adkeeyay in wadahadal siyaasadeed oo joogto ah uu muhiim u yahay ilaalinta xasilloonida Soomaaliya, xoojinta dowlad-dhiska, iyo horumarinta nidaamka dimuqraadiyadeed ee dalka.
Sidoo kale IGAD ayaa ugu baaqday dhammaan dhinacyada Soomaaliyeed inay ka shaqeeyaan xalal mideynaya shacabka, kor u qaadaya kalsoonida bulshada, isla markaana ilaalinaya mustaqbalka fog ee xasilloonida iyo horumarka hay’adaha dowladda.
IGAD waxay sheegtay inay si buuxda u taageersan tahay dadaallada ay Soomaalidu hoggaaminayaan ee lagu xaqiijinayo dowlad loo dhan yahay, nabad waarta iyo mustaqbal ammaan ah oo Soomaaliya iyo guud ahaan gobolka Geeska Afrika ah.
