Qaramada Midoobey ayaa sheegtay inay si dhow ula socoto xaaladda siyaasadeed ee Soomaaliya, gaar ahaan wada-hadalladii u dambeeyay ee dhexmaray Dowladda Federaalka Soomaaliya iyo xubnaha mucaaridka ah ee ku mideysan Golaha Mustaqbalka Soomaaliya.
War qoraal ah oo kasoo baxay xafiiska Xoghayaha Guud ee Qaramada Midoobey ayaa lagu sheegay in Xoghayaha Guud uu soo dhoweynayo dadaallada labada dhinac ay ku doonayaan inay wadahadal ku gaaraan is-afgarad la xiriira arrimaha doorashooyinka iyo jihada siyaasadeed ee dalka.
Qaramada Midoobey ayaa ku boorrisay Dowladda Federaalka iyo mucaaridka inay sii xoojiyaan wada-xaajoodyada si loo gaaro heshiis siyaasadeed oo mideeya dhinacyada kala duwan, islamarkaana horseeda doorashooyin loo dhan yahay oo dalka ka qabsooma.
Sidoo kale, war-saxaafadeedka ayaa lagu xusay in xasilloonida siyaasadeed iyo wada-shaqeynta dhinacyada siyaasadda ay laf-dhabar u yihiin amniga, dowlad-dhiska iyo horumarka Soomaaliya, xilli dalku wajahayo xaalado siyaasadeed oo xasaasi ah.
Wadahadallada u dhexeeya Dowladda Federaalka Soomaaliya iyo Golaha Mustaqbalka Soomaaliya ayaa yimid xilli ay weli taagan yihiin doodaha ku saabsan hannaanka doorashooyinka, dib-u-eegista dastuurka iyo awood-qaybsiga siyaasadeed ee dalka.
Qaramada Midoobey ayaa hore dhowr jeer ugu baaqday madaxda Soomaaliyeed iyo saamileyda siyaasadda inay mudnaanta siiyaan wadatashiga iyo heshiiska siyaasadeed si looga fogaado khilaafyo saameyn ku yeesha geeddi-socodka dowladnimada iyo xasilloonida dalka.
