Dowladda Federaalka Soomaaliya ayaa si adag u cambaareysay qorshe uu maamulka Somaliland ku sheegay inuu ku furayo waxa loogu yeeray safaarad magaalada Qudus, iyadoo ku tilmaantay tallaabadaasi mid sharci-darro ah oo aan la aqbali karin.
Bayaan ka soo baxay wasaaradda Arrimaha dibada Soomaaliya ayaa lagu sheegay in qorshahaasi aanu lahayn wax sharciyad ama saameyn sharciyeed ah, islamarkaana uu meel ka dhac ku yahay mowqifka dalalka Carabta iyo caalamka Islaamka ee ku aaddan magaalada Qudus.
Dowladda Federaalka Soomaaliya ayaa sidoo kale markale xaqiijisay sida ay uga go’an tahay ilaalinta midnimada, madaxbannaanida iyo wadajirka dhuleed ee dalka, iyadoo sheegtay inay si adag uga hortagayso tallaabo kasta oo hal dhinac ah oo wax u dhimaysa jiritaanka dowladnimada Soomaaliya.
Dowladdu waxay intaas ku dartay in tallaabooyinka noocaas ahi ay ka hor imaanayaan shuruucda caalamiga ah iyo go’aannada ay soo saareen hay’adaha heer gobol iyo kuwa caalami ah.
Somaliland ayaa shaacisay in ay qorshaynayso in ay safaaraddeeda ka furto magaalada Qudus oo ah dhulka reer Falastiin ee Israaiil xoogga ku haysato, halka Israa’iil ay sidoo kale sheegtay in ay ka furan doonto safaarad magaalada Hargeysa, sida uu sheegay danjiraha Somaliland ee Israa’iil, Maxamed Hagi.
Dowladda Soomaaliya ayaa kordhisay tallaabooyinka ay ugu hortagayso xiriirka sii xoogeysanaya ee u dhexeeya Soomaaliland iyo Israa’iil.
