Wararka ka imaanaya magaalada Boosaaso ayaa sheegaya in goobaha ganacsiga ee magaaladaasi ay maanta oo Sabti ah albaabada isugu laabeen, kaddib markii uu sii socdo xirnaanshaha Dekedda Boosaaso oo maalintii 11-aad xiran.
Ganacsatada magaalada ayaa tallaabadan qaaday kaddib markii ay ka biyo diideen khidmad cusub oo ay soo rogtay shirkadda maamusha Dekedda Boosaaso ee DP World, taas oo ay sheegeen inay saameyn ku yeelanayso ganacsiga iyo dhaq-dhaqaaqa dhaqaale ee Puntland.
Xirnaanshaha dekedda ayaa saameyn weyn ku yeeshay isu socodka badeecooyinka, iyadoo Boosaaso ay tahay dekedda ugu weyn ee ganacsiga Puntland, lagana soo dejiyo raashinka, shidaalka, dawooyinka, qalabka dhismaha iyo badeecooyin kale oo muhiim ah.
Waxaa dekedda ku xayiran boqolaal gaadiid xamuul ah, halka maraakiibta qaar ay dib u dhac kala kulmayaan dejinta iyo rarista shixnadahooda.
Sidoo kale waxaa jira walaac laga qabo in haddii xaaladdu sii socoto ay kor u kici karaan qiimaha badeecooyinka iyo maciishadda.
Dowladda Puntland ee uu hoggaamiyo Madaxweyne Siciid Cabdullaahi Deni ayaan weli si rasmi ah uga hadlin muddada dheer ee ay dekeddu u xiran tahay iyo xalinta khilaafka ka dhashay khidmadaha cusub.
Dhanka kale, magaalada Boosaaso waxaa laga dareemayaa qabanqaabada mudaharaadyo looga soo horjeedo canshuurta cusub ee lagu soo rogay gaadiidka iyo badeecadaha ka soo dega dekedda.
