Golaha Wakiillada Maamulka Waqooyi Bari Soomaaliya ayaa soo saaray qaraar rasmi ah oo ku baaqaya in maxkamad la horkeeno saraakiisha iyo askarta lagu qabtay dagaalkii Goojacadde ee ka dhacay duleedka Laascaanood sannadkii 2023, kuwaas oo lagu eedeeyay dambiyo ka dhan ah xuquuqda aadanaha.
Qaraarka ayaa lagu sheegay in lagu ansixiyay fadhi caadi ah oo Golaha yeeshay, iyadoo lagu saleeyay waajibaadka dastuuriga ah ee ilaalinta caddaaladda, sarreynta sharciga iyo dhowrista xuquuqda shacabka.
Goluhu wuxuu ugu baaqay xukuumadda inay si degdeg ah maxkamadaha awoodda u leh u horgeyso dhammaan dadka loo haysto dambiyada la xiriira dagaalkii Goojacadde, si dacwadahooda loogu qaado hannaan waafaqsan sharciga.
Inkastoo bayaanka uusan si toos ah u magacaabin shaqsiyaadka la maxkamadeynayo, haddana wuxuu dalbanayaa in la dedejiyo kiisaska dadka ku xiran xabsiyada maamulka ee loo haysto dambiyada ka dhanka ah Waqooyi Bari Soomaaliya.
Sidoo kale, Golaha Wakiilladu wuxuu adkeeyay in dacwadaha loo maro hannaan hufan oo caddaalad ah, isla markaana la dhowro dhammaan xuquuqaha uu sharcigu siinayo eedeysanayaasha inta uu socdo geeddi-socodka garsoorka.
Saraakiil iyo askar ka tirsan Somaliland ayaa lagu qabtay dagaalkii Goojacadde ee dhacay sannadkii 2023, waxaana tan iyo xilligaas ku xirnaa xabsiyada maamulka Waqooyi Bari. Qaraarkan ayaa noqonaya tallaabadii ugu horreysay ee rasmi ah oo Golaha Wakiilladu ku dalbado in kiisaskooda loo gudbiyo maxkamadaha.
