AFRICOM”Mareykanku Ma qorsheynayo Aqoonsiga Somaliland iyo Saldhig Ciidan oo uu ka dhisto Deegaannadeeda”

Taliyaha Ciidamada Mareykanka ee Qaaradda Afrika (AFRICOM), Jeneraal Dagvin Anderson, ayaa caddeeyay in Mareykanku uusan wax qorshe ah u lahayn inuu aqoonsado Somaliland ama uu saldhig ciidan ka sameysto deegaannada ay maamusho.
Jeneraal Anderson ayaa sheegay in siyaasadda arrimaha dibadda ee Mareykanka ay weli ku dhisan tahay taageeridda madaxbannaanida, midnimada iyo wadajirka dhuleed ee Jamhuuriyadda Federaalka Soomaaliya.
Waxa uu sidoo kale xusay in xiriirka iskaashi ee u dhexeeya Mareykanka iyo Dowladda Federaalka Soomaaliya uu sii socon doono, isla markaana aysan jirin wax isbeddel ah oo ku yimid mowqifka Washington ee ku aaddan Soomaaliya.
Hadalkan ayaa meesha ka saaraya warar iyo hadal-heyn muddooyinkii u dambeeyay la xiriiray suuragalnimada in Mareykanku aqoonsado Somaliland ama uu saldhig ciidan ka sameysto deegaannadeeda.