Madaxweynaha Soomaaliya, Xasan Sheekh Maxamuud, ayaa Xarunta Madaxtooyada ku qaabilay Taliyaha Ciidanka Qalabka Sida ee Jamhuuriyadda Jabuuti, Jeneraal Sakaria Sheekh Ibrahim, iyo wafdi saraakiil sare ah oo uu hoggaaminayay.
Wafdiga Jabuuti ayaa Muqdisho u yimid ka qaybgalka Shirka Taliyeyaasha Ciidamada ee dalalka ka qaybta ah Hawlgalka Taageerada iyo Xasilinta Midowga Afrika ee Soomaaliya (AUSSOM), kaas oo looga hadlayo xoojinta iskaashiga amniga, isku-dubbaridka hawlgallada iyo dardargelinta dadaallada lagu xaqiijinayo nabadda iyo xasilloonida Soomaaliya.
Kulanka Madaxweyne Xasan Sheekh iyo Taliyaha Ciidanka Jabuuti ayaa lagu adkeeyay xiriirka walaaltinimo iyo iskaashiga difaaca ee u dhexeeya labada dal. Madaxweynaha ayaa uga mahadceliyay dowladda iyo shacabka Jabuuti kaalinta ay ka qaadanayaan taageerada amniga Soomaaliya, la dagaallanka argagixisada iyo dib u dhiska hay’adaha amniga dalka.
Kulankan ayaa imanaya iyadoo ay Muqdisho ka socdaan kulammo amni oo ay yeelanayaan hoggaamiyeyaasha ciidamada dalalka ciidamada ku leh howlgalka AUSSOM, kuwaas oo looga gol leeyahay sare u qaadidda wada-shaqeynta amniga gobolka.
