Warar soo baxaya ayaa sheegaya in daneeyayaasha beesha caalamka ay gabagabeynayaan wada-tashiyo ay toddobaadyadii lasoo dhaafay la yeesheen siyaasiyiinta Soomaaliya ee doonaya inay u tartamaan xilka madaxtinimada dalka.
Wadatashiyada ayaa waxaa ka qeyb galay siyaasiyiin ka kala tirsan dowladda iyo mucaaradka, iyadoo diiradda lagu saaray aragtida dhinacyada siyaasadda iyo shuruudaha ay u arkaan in doorasho lagu kalsoonaan karo ay Soomaaliya ka dhacdo.
Ilo xog-ogaal ah ayaa sheegaya in daneeyayaasha caalamka iyo deeq-bixiyeyaasha ay hadda ku jiraan marxaladdii ugu dambeysay ee diyaarinta qabyo-qoraalka heshiis siyaasadeed oo la doonayo in dhinacyada Soomaalida ay ku mideysnaadaan.
Sida xogaha la helayo, heshiiska ayaa la filayaa in lagu saxiixo magaalada Muqdisho, gaar ahaan xarunta Xalane, waxaana qayb ka noqon kara madaxweynayaasha maamul-goboleedyada Puntland iyo Jubaland, Siciid Cabdullaahi Deni iyo Axmed Maxamed Islaam (Axmed Madoobe).
Heshiiskan ayaa la filayaa inuu diiradda saaro sidii loo heli lahaa is-afgarad siyaasadeed oo ku saabsan hannaanka doorashada, waqtigeeda iyo qaabka loo xaqiijin karo in doorashadu noqoto mid ay dhinacyada siyaasadda Soomaaliya ku wada qanacsan yihiin.
Wadahadalladan ayaa kusoo beegmaya xilli Soomaaliya ay wajahday marxalad siyaasadeed oo xasaasi ah, iyadoo dowladda Federaalka iyo mucaaradka ay weli isku khilaafsan yihiin qaabka iyo waqtiga doorashada dalka.
Haddii heshiiskan la gaaro, waxaa uu noqon karaa tallaabo muhiim ah oo lagu dejinayo xiisadda siyaasadeed, laguna abuuro jawi ay dhinacyada kala duwan uga wada shaqeeyaan doorasho heshiis lagu yahay.
