Agaasimaha Hay’adda Sirdoonka iyo Nabadsugida Qaranka (NISA), Mahad Maxamed Salaad, ayaa ka qaybgalay fadhiga 7-aad ee Shirka Madaxda Hay’adaha Sirdoonka dalalka Carabta, kaas oo ay isugu yimaadeen wakiillo ka socday 22 dal oo Carbeed.
Shirkan oo lagu qabtay magaalada Baqdaad ee caasimadda dalka Ciraaq ayaa diiradda lagu saaray xoojinta wadashaqaynta, iskaashiga iyo is-weydaarsiga xogta amniga ee u dhexeeya hay’adaha sirdoonka dalalka Carabta, si loo wajaho caqabadaha amni ee isa soo taraya.
Intii uu socday shirka, ayaa si gaar ah loo falanqeeyay muhiimadda ay leedahay midnimada, wadajirka iyo ilaalinta madax-bannaanida dowladaha Carabta, iyadoo sidoo kale xoogga la saaray dadaallada lagula dagaallamayo kooxaha argagixisada ah iyo shabakadaha khatarta ku ah xasilloonida gobolka.
Agaasimaha NISA, Mudane Mahad Salaad, ayaa kulammo gaar gaar ah la yeeshay qaar ka mid ah madaxda hay’adaha sirdoonka dalalka ka qaybgalay shirka, kuwaas oo looga hadlay xoojinta iskaashiga dhinacyada amniga, tababarrada iyo wadaagga xogaha muhiimka ah.
Shirkan ayaa qeyb ka ah dadaallada lagu horumarinayo amniga guud ee dalalka Carabta, isla markaana lagu xoojinayo wada shaqaynta ka dhanka ah khataraha argagixisada iyo dambiyada abaabulan.
