War ka soo baxay Taliska Booliska Soomaaliyeed ayaa lagu sheegay in ciidanka Booliska gaar ahaan kuwa saldhigga degmada Warta-Nabadda ay gacanta ku soo dhigeen toddobo dhalinyaro ah, kuwaas oo lagu eedeeyay inay ku kaceen falal halis gelinayay naftooda iyo tan bulshada.
Magacyada dhalinyarada la soo qabtay ayaa lagu sheegay:
Khatar Ibraahim Xasan
Daahir Maxamuud Xasan
Cabdullaahi Maxamed Xasan
Maxamed Cabdiraxmaan Barre
Xuseen Mukhtaar Axmed
Sakariye Cabdullaahi Cumar
Axmed Cusmaan Maxamed
Booliska ayaa sheegay in dhalinyaradan ay isku dayeen in ay amni darro ka abuuraan garoonka kubadda cagta ee Stadium Muqdisho, halkaas oo ay ka socdaan ciyaaraha degmooyinka gobolka Banaadir.
Ciidanka Booliska Soomaaliyeed waxay digniin adag u direen dhalinyarada kale ee ku hawlan falalka noocan oo kale ah, iyagoo ku booriyay inaysan garoomada iyo goobaha bulshada la soo gelin wax kasta oo dhaawac u horseedi kara naftooda ama bulshada.
Booliska ayaa xusay in tooreyda, sakiimaha iyo hub kasta oo khatar ah laga mamnuucay garoomada iyo goobaha dadweynaha, isla markaana qof kasta oo lagu qabto isagoo ku kacaya fal amni darro ah laga qaadi doono tallaabo adag oo sharciga waafaqsan.
Taliska Booliska ayaa sheegay in la adkeeyay howlaha sugidda amniga, isla markaana la qaaday tallaabooyin looga hortagayo dhalinyarada isku dayda inay caasimadda Muqdisho ka abuuraan falal khatar gelin kara nabadgelyada guud iyo amniga bulshada.
