Taliska Qaybta Guud ee Booliska Gobolka Banaadir ayaa shaaciyay tallaabooyin cusub oo lagu adkeynayo amniga Caasimadda, laguna xakameynayo falalka khatarta ku ah bulshada iyo xasilloonida magaalada.
Shirka toddobaadlaha ah ee Booliska Caasimadda, oo uu shir-guddoomiyay Taliyaha Qaybta Guud ee Booliska Gobolka Banaadir, Gaashaanle Sare Mahdi Omar Mumin, ayaa looga hadlay qorshayaal lagu wajahayo caqabadaha amniga, gaar ahaan ka hortagga maandooriyaha, falalka anshax-darrada ah iyo dhaqamada dhalinyarada qaarkood ee khatarta ku ah naftooda iyo bulshada.
Taliyaha ayaa faray saraakiisha Booliska in si wadajir ah ay tallaabo uga qaadaan dadka isticmaala iyo kuwa ka ganacsada maandooriyaha, isagoo ku tilmaamay arrintan khatar weyn oo saameyn ku leh mustaqbalka dhalinyarada iyo nabadgelyada guud.
Sidoo kale, Taliye Mahdi ayaa amar ku bixiyay in tallaabo sharci ah laga qaado dadka ku baahiya fariimaha guracan ee baraha bulshada, iyo dhalinyarada si qaldan u adeegsanaya aaladaha bulshada, kuwaas oo duuba muuqaallo ka hor imanaya anshaxa. Waxa uu si gaar ah u xusay dhalinyarada halista ku ah naftooda iyo dadka kale, sida kuwa isku dhiga gaadiidka socda waddooyinka iyo kuwa hubka ku ciyaara.
