In ka badan 600,000 oo qof oo ku nool gobolka Kyiv ee Ukraine ayaa koronto la’aan ah ka dib weerar Ruushku uu xalay ka geystay halkaas, sida ay sheegeen saraakiishu.
Wasaaradda Tamarta ee Ukraine ayaa sheegtay in in ka badan 500,000 oo ka mid ah dadkaas ay joogaan caasimadda lafteeda, halka inta kale ay ku nool yihiin gobolka ku hareereysan. Koronto la’aanta ayaa loo sababeeyay gantaallo iyo weerarro ay fuliyeen diyaaradaha aan duuliyaha lahayn oo lagu qaaday kaabayaasha tamarta ee magaalada iyo dhowr gobol oo kale.
Saraakiisha ayaa sheegay in qiyaastii 36 gantaal iyo ku dhowaad 600 oo diyaaradahaas ah lagu riday bartilmaameedyo ku kala yaal Ukraine ilaa Sabtidii, waxaana ku dhintay saddex qof, tobanaan kalena way ku dhaawacmeen.
Ruushka ayaa xoojiyay weerarrada uu ku hayo kaabayaasha madaniga ah iyo kuwa tamarta ee Ukraine, iyadoo dalku uu galayo xilliga jiilaalka, inkastoo ay socdaan dadaallo Maraykanku hoggaaminayo oo lagu doonayo in lagu xaqiijiyo heshiis nabadeed.
