Wararka naga soo gaaraya magaalada Baydhabo ayaa sheegaya in xaalad siyaasadeed iyo mid amni ay ka aloosan tahay halkaasi, kadib markii ciidamo taabacsan Madaxweynaha Koonfur Galbeed Cabdicasiis Xasan Maxamed Laftagareen ay si cad u diideen in doorasho ay ka dhacdo magaalada oo ay qabato Dowladda Federaalka Soomaaliya.
Ciidamadan ayaa la sheegay inay ku hubeysan yihiin gaadiid dagaal oo tiro badan, iyagoo sidoo kale ku hanjabay in aanay suuragal ahayn in diyaarado ay ka soo degaan Baydhabo, haddii ay la xiriiraan qorshaha doorashooyinka.
Ciidamada ayaa fariin adag u diray Dowladda Federaalka, iyagoo sheegay in aan Baydhabo lagu maamuli karin go’aanno ka yimaada Muqdisho.
Taliyihii hore ee ciidamada Koonfur Galbeed, Isaaq Cali Isaaq (Meedeey), ayaa sheegay in amniga Baydhabo uu gacanta ka baxay Dowladda Federaalka Soomaaliya.
Wuxuu intaas ku daray in hubkii la geeyay Muqdisho aan dib loo celin doonin, taas oo sii kordhin karta xiisadda.
Xiisaddan ayaa noqon karta caqabad cusub oo soo wajahda Dowladda Federaalka, gaar ahaan xilli dalka uu wajahayo muran ku saabsan hannaanka doorashooyinka.
Waxaa jira cabsi laga qabo in xaaladdu isu beddesho isku dhac ciidan haddii aan xal degdeg ah laga gaarin.
