Dowladda Soomaaliya ayaa war-saxaafadeed ka soo saartay duqeyn ka dhacday gobolka Mudug, gaar ahaan nawaaxiga Tawarmooge oo u dhow deegaannada Caad iyo Xarardheere.
Qoraal ka soo baxay Wasaaradda Gaashaandhigga ayaa lagu sheegay in Ciidanka Xoogga Dalka Soomaaliyeed, oo kaashanaya saaxiibbada caalamka, ay fuliyeen hawlgal cirka ah oo lagu bartilmaameedsaday maleeshiyaadka argagixisada, xilli ay isku uruursanayeen goob lagu tuhunsanaa inay ku qorsheynayeen weerarro.
Duqeynta ayaa la sheegay in lagu dilay ku dhowaad 70 maleeshiyaad ah oo ay ku jiraan horjoogayaal, halka 90 ilaa 95 kale lagu dhaawacay. Sidoo kale, waxaa la burburiyay 8 gaadiid dagaal oo ay kooxdaasi lahayd, oo ay ku jireen kuwa sahayda qaada.
Wasaaradda Gaashaandhigga ayaa caddeysay in hawlgallada ka dhanka ah argagixisada ay si joogto ah u socdaan, iyadoo Ciidanka Xoogga Dalka ay ka go’an tahay sugidda amniga iyo xasilloonida dalka.
