Dowladda Federaalka Soomaaliya ayaa si adag u cambaareysay weerarradii diyaaradaha aan duuliyaha lahayn (drones-ka) ee lagu beegsaday Boqortooyada Sacuudi Carabiya, iyadoo ku tilmaantay falal halis ku ah amniga iyo xasilloonida gobolka.
War-saxaafadeed ka soo baxay Wasaaradda Arrimaha Dibadda Soomaaliya ayaa lagu sheegay in Soomaaliya ay garab taagan tahay Boqortooyada Sacuudi Carabiya, oo ay ku tilmaantay dal walaal ah isla markaana saaxiib dhow la ah Dowladda Federaalka Soomaaliya.
Dowladda Soomaaliya ayaa muujisay walaaceeda ku aaddan badqabka dadka rayidka ah, waxayna mar kale xaqiijisay taageeradeeda buuxda ee dhammaan tallaabooyinka lagu ilaalinayo amniga, madaxbannaanida iyo wadajirka dhuleed ee Boqortooyada Sacuudi Carabiya.
Sidoo kale, Soomaaliya ayaa sheegtay in amniga Sacuudi Carabiya uu muhiim u yahay xasilloonida gobolka iyo ilaalinta xorriyadda isu socodka maraakiibta ee Badda Cas.
Ugu dambeyn, Dowladda Federaalka Soomaaliya ayaa ku baaqday in khilaafaadka lagu xalliyo wada-hadal iyo diblomaasiyad, iyadoo adkeysay muhiimadda is-xakameynta si looga hortago sii hurinta xiisadaha, isla markaana ballanqaadday inay sii wadi doonto wada-shaqeynta ay la leedahay dalalka gobolka iyo beesha caalamka si loo xoojiyo nabadda iyo amniga gobolka.
