Madaxweynaha Soomaaliya Xasan Sheekh Maxamuud ayaa xilkii ka qaaday Guddoomiye ku xigeenkii Howlaha Guud ee Gobolka Banaadir Xasan Maxamed Jimcaale, waxaana xilkaasi loo magacaabay Wiil dhalinyaro ah oo lagu magacaabo C/majid Daahir Aadan, kaasoo maanta xilka la wareegay.
Waa mas’uulkii labaad ee ka mid ah Madaxda Gobolka Banaadir oo xilka uu ka qaadayo Madaxweynaha, iyadoo dhawaan xilka laga qaaday xoghayihii guud ee Gobolka Banaadir.
Guddoomiyaha Gobolka Banaadir ahna Duqa Magaalada Muqdisho Xasan Maxamed Xuseen (Muungaab) ayaa xilka u kala wareejiyay Cabdimajiid Daahir Aadan oo uu dhawaan Madaxweynaha JFS Dr. Xasan Sheekh Maxamuud u magacaabay Guddoomiye Kuxigeenka Howlaha Guud ee Maamulka Gobolka Banaadir iyo Guddoomiye Kuxigeenka xafiiska banneeyay Xasan Maxamed Jimcaale.
Duqa Muqdisho ayaa uga mahadceliyay Guddoomiye Kuxigeenkii hore ee Howlaha Guud Xasan Maxamed Jimcaale shaqooyinkii uu soo qabtay inta uu xafiiska joogay, asigoona Guddoomiye Kuxigeenka Cusub ee Howlaha Guud Cabdimajiid Daahir Aadan kula dardaarmay dardargelinta shaqooyinka xafiiska howlaha guud ee Maamulka Gobolka Banaadir iyo Dowladda Hoose ee Xamar.
