Ciidamada Xoogga Dalka Soomaaliyeed ayaa habeenimadii xalay fuliyay howlgallo qorsheysan oo ka dhacay deegaano ka tirsan gobollada Bakool iyo Baay, kuwaas oo lagu beegsaday horjoogeyaal iyo xubno ka tirsanaa kooxda Al-Shabaab.
Howlgalka koowaad oo ka dhacay tuulada Abal, oo qiyaastii 21 km u jirta koofurta magaalada Xudur ee gobolka Bakool, ayaa lagu khaarajiyay horjooge sare oo lagu magacaabi jiray Maxamed Cabdi Maxamed Nuur (Goofoow). Ninkan ayaa ahaa Amiirka kooxda Al-Shabaab ee saldhigga Abal, wuxuuna ka mid ahaa maskaxdii ka dambeysay weerarradii argagixisada ee lagu dhibaateyn jiray shacabka gobolka Bakool.
Intii uu howlgalka socday, ciidanka ayaa gacanta ku dhigay hub iyo dukumentiyo muhiim ah oo muujinaya qorshayaal ay kooxdaasi u diyaarineysay falal amni-darro iyo weerarro ka dhan ah shacabka iyo ciidamada.
Sidoo kale, howlgal kale oo ciidanku ka fuliyeen tuulada Waro Mintaaniya, oo 14 kiiloomitir koonfur-bari kaga beegan deegaanka Burjeet ee gobolka Baay, ayaa lagu dilay laba xubnood oo muhiim ah oo ka tirsanaa Al-Shabaab, kuwaas oo lagu kala magacaabo Yaxye (Abuu Khaalid) abaabulaha weerarrada argagixisada, iyo Shariif (Amiir) — kaas oo u dhintay dhaawacyo culus oo uu ku qaaday howlgalkaas.
