In ka badan 70,000 oo Falastiiniyiin ah ayaa la dilay tan iyo intii uu billowday ololaha militariga Israa’iil ee Gaza, sida ay sheegtay wasaaradda caafimaadka ee Xamaas ay maamusho.
Dhimashada ayaa sii kordheysa tan iyo markii ay dhaqan gashay xabbad joojinta 10kii Oktoobar, iyadoo Israa’iil ay qaadday duqeymo cirka ah oo ay ku sheegtay in ay Xamaas ku xad-gudbeen xabbad joojinta – iyadoo weli meydadka laga soo saarayo burburka hoostiisa.
Dadka la sheegay in lagu dilay duqeyn ay geysteen diyaaradaha aan duuliyaha lahayn ee Israa’iil Sabtidii lasoo dhaafay ayaa waxaa ka mid ahaa labo wiil oo walaalo ah oo lagu kala magacaabo Fadi iyo Juma Abu Assi, kuwaasi oo qoyskooda ay sheegeen in markii la dilayay ay xaabo guranayeen.
Ciidamada difaaca Israa’iil ee magacooda loo soo gaabiyo (IDF) ayaa BBC-da u sheegay in ay dileen labo tuhmane oo ka soo gudbay waxa loogu yeero khadka jaallaha ah.
