Maamulka Koonfur Galbeed Soomaaliya ayaa maanta si rasmi ah uga codsaday dowladda dhexe in ay u soo gacan geliso Xildhibaan Daahir Amiin Jeesow, kaasi oo ay ku eedeeyeen inuu door ku leeyahay xiisadaha colaadeed ee ka taagan deegaanada Yaaq-Birweyne iyo Wanla-weyn
Wasiirka amniga ee Koofur Galbeed oo shir jaraa’id ku qabtay magaalada Baydhabo ayaa sheegay in maamulka uu doonayo in xildhibaanka loo horkeeno maxkamad, si loo marsiiyo cadaaladda, haddii lagu helo eedaha la xiriira kicin, hurinta colaadaha iyo amni-darrada deegaanka.
Wasiirka ayaa xusay in dagaalka Yaaq-Birweyne iyo Wanlaweyn uusan ahayn mid qabyaaladeed oo keliya, balse uu salka ku hayo dano siyaasadeed iyo falal fool xun oo lagula kacay dadka deegaanka, kuwaas oo aan la aqbali karin in lagu soo celceliyo.
Hadalka wasiirka ayaa ku soo aadaya kadib markii Xildhibaan Daahir Amiin Jeesow uu shir uu ku qabtay magaalada Muqdisho ku dhaliilay ciidamada Koofur Galbeed, iyo kuwa xoogga dalka gaar ahaan Guutada 7aad, isaga oo ku eedeeyay inay geysteen dilal ka dhan ah shacabka deegaanka.
Xildhibaan Jeesow ayaa hadalkiisa ku yiri:
“Carruur iyo Hooyooyin ayey Yaaq-Biriweyne ku dileen Guutada 7aad ee uu wato Axmed Gaashaan. Hello Gaal Jecel, waxaad amar u qabtaan in aad isdifaacdaan.”
Isagoo sii hadlayay ayuu sheegay in weerarkii shalay lagu qaaday beesha uu kasoo jeedo uu ahaa mid qorsheysan, islamarkaana uu u baahan yahay in si degdeg ah loo joojiyo.
Hadalka Xildhibaanka ayaa si weyn u kiciyay xaaladda, waxaana maamulka Koonfur Galbeed ay sheegeen in hadallada noocan ah ay abuuri karaan xiisad hor leh, taas oo sababtay in ay codsadaan in dowladda dhexe tallaabo ka qaado.
