Maxkamada Racfaanka Gobolka Galgaduud ayaa goordhaw dil toogasho ah ku xukuntay, Cabdi Cismaan Cabdulahi iyo Galad Ahmed Xuseen.
Sidoo kale Maxkamadu waxay xukun xabsi shan sano ah ku riday Ayuub Maxamed Cabdi.
Raggaan ayaa loo heystay dilka Hooyo iyo saddex gabdhood oo ay dhashay, kkuwasi oo lagu dilay deegaan ku dhaw Qaayib oo ka tirsan Gobolka Galgaduud.
Kiiskan oo kamid ahaa dhacdooyinkii ugu naxdinta badnaa ee ka dhacay deegaanka Qaayib, ayaa muddo bilooyin ah marqaatina iyo caddeymo isdaba yaal loo gudbinayay maxkamadda. Maxkamadda Racfaanka ayaa kiiskan dib u dhageysatay shan jeer, maadaama ay mar kasta soo kordhayeen xog cusub iyo dood difaac oo ay soo gudbiyeen qareennada labada dhinac.
Guddoomiyaha Maxkamadda Racfaanka ayaa maanta ku dhawaaqay go’aanka kama dambeysta ah, kaas oo noqday:
Cabdi Cismaan Cabdullaahi – Dil toogasho ah
Galad Axmed Xuseen – Dil toogasho ah
Ayuub Maxamed Cabdi – Shan sano oo xabsi ah
Maxkamaddu waxay sheegtay in labada eedeysane ee lagu riday dilka toogashada ay ku cadaatay ka qeybqaadashadii dilka hooyada iyo saddexda gabdhood, halka Ayuub Maxamed Cabdi lagu helay inuu qayb ka ahaa falka balse aysan caddeymo buuxa oo toos ah loogu helin dilka, taas oo sababtay in xukunkiisu ka yaraado.
