Madaxweynaha Soomaaliya, Xasan Sheekh Maxamuud, ayaa ku wajahan yahay magaalada Dhuusamareeb, ee caasimadda Dowlad Goboleedka Galmudug.
Wafdi horudhac u ah Madaxweynaha ayaa shalay gaaray magaalada Dhuusamareeb, halkaas oo lagu wado in lagu soo dhoweeyo Madaxweynaha iyo wafdigiisa.
Wararka ayaa sheegaya in booqashada Madaxweynaha ay la xiriirto xaaladda siyaasadeed ee Galmudug, gaar ahaan doorashadii dhowaan ka dhacday maamulka iyo sidii loo dhammaystiri lahaa geeddi-socodka doorashada.
Sidoo kale, Madaxweynaha ayaa la filayaa inuu kulamo la yeesho dhinacyada kala duwan ee siyaasadda iyo bulshada, gaar ahaan cid kasta oo tabasho ka qabta geeddi-socodka doorashada, si loo dhageysto aragtiyahooda loona raadiyo xal u gaar ah tabashooyinka jira.
Inta uu ku sugan yahay Dhuusamareeb, Madaxweyne Xasan Sheekh ayaa sidoo kale lagu wadaa inuu xarigga ka jaro laamiga cusub iyo garoonka diyaaradaha Dhuusamareeb, kuwaas oo ka mid ah mashaariicda horumarineed ee laga wado caasimadda Galmudug.
Madaxweynaha ayaa sidoo kale la filayaa inuu soo xiro tababar loo sameeyay cutubyo ka tirsan Ciidanka Xoogga Dalka Soomaaliyeed, iyadoo munaasabaddaasi ay qayb ka noqon doonto barnaamijka dib-u-dhiska iyo tayeynta ciidamada dowladda.
Booqashada Xasan Sheekh ee Dhuusamareeb ayaa kusoo beegmaysa xilli ay Galmudug ka jiraan isbeddello siyaasadeed iyo dadaallo lagu dhammaystirayo geeddi-socodka doorashada, iyadoo indhaha lagu hayo kulamada uu Madaxweynaha la yeelan doono madaxda maamulka iyo dhinacyada kale ee siyaasadda.
