Madaxweynaha Masar, Cabdulfataax Al-Sisi, ayaa khadka taleefanka kula hadlay Madaxweynaha Kenya, William Ruto, iyagoo si gaar ah uga wada hadlay xaaladda Soomaaliya iyo guud ahaan gobolka Geeska Afrika. Labada hoggaamiye ayaa isku raacay muhiimadda ay leedahay in la xoojiyo dadaallada lagu xaqiijinayo nabad, xasillooni iyo midnimo siyaasadeed, si loo ilaaliyo madax-bannaanida iyo midnimada dhuleed ee Soomaaliya.
Afhayeenka Madaxtooyada Masar ayaa sheegay in labada madaxweyne ay si weyn uga doodeen arrimaha amniga iyo xasilloonida Geeska Afrika, ayna isku raaceen in la sii wado wada-shaqaynta ku aaddan sidii loo taageeri lahaa dowladnimada Soomaaliya iyo dadaallada lagu xasilinayo gobolka oo dhan.
Madaxweyne Sisi ayaa ka hadlay muhiimadda ilaalinta midnimada iyo madaxbannaanida Suudaan, isagoo xusay dadaalka Masar ee lagu dhimayo masiibada bani’aadantinimo ee halkaas ka taagan.
Madaxweyne Sisi ayaa mar kale muujiyay mowqifka Masar ee ka dhanka ah tallaabooyinka Itoobiya ee saameyn kara xuquuqda biyaha ee dalkiisa, halka Madaxweyne Ruto uu ku baaqay wada-shaqeyn iyo isfaham dhex mara dalalka ku yaalla webiga Nile.
Labada Madaxweyne ayaa ugu dambeyntii ku celiyay sida ay uga go’an tahay in la sii xoojiyo wadatashiga siyaasadeed, iskaashiga amniga iyo wadajirta gobolka, si loo gaaro nabad waarta iyo horumar guud oo ka dhaca Geeska Afrika.
Dalalka Kenya iyo Masar ayaa ka mid ah wadamada si weyn taageerada u siiya Soomaaliya.
