Madaxweynaha Soomaaliya, Xasan Sheekh Maxamuud, ayaa maanta codkiisa ka dhiibtay doorashada golayaasha deegaanka ee Gobolka Banaadir, taas oo ah doorashadii ugu horreysay ee dadweynuhu si toos ah u codeeyaan tan iyo sanadkii 1969.
Madaxweynaha ayaa ka codeeyey degmada Warta Nabadda ee magaalada Muqdisho, isagoo muujiyay muhiimadda ay doorashadani u leedahay dib-u-dhiska dowladnimada, xoojinta dimuqraadiyadda iyo ka qeyb-galka shacabka ee talada dalka.
Kadib markii uu codeeyay, Madaxweyne Xasan Sheekh Maxamuud ayaa sheegay in dowladda ay ka shaqeynayso siyaasad mideysan oo ay ku mideysan yihiin dhammaan walaalaha Soomaaliyeed, gaar ahaan kuwa ka maqan geeddi-socodka siyaasadeed, isagoo ku boorriyay in la helo wada-shaqeyn iyo is-afgarad qaran.
Doorashada golayaasha deegaanka ee Gobolka Banaadir ayaa waxaa ka qeyb galaya 20 urur siyaasadeed, waxaana lagu dooranayaa 390 kursi, iyadoo kumannaan ka mid ah shacabka Muqdisho ay maanta u dareereen goobaha codbixinta ee 16-ka degmo ee gobolka.
Dhacdadan taariikhiga ah ayaa sidoo kale soo jiidatay indhaha warbaahinta caalamiga ah, kuwaas oo si dhow ula socday habsami u socodka doorashada, amniga la sugay iyo ka qeyb-galka ballaaran ee shacabka, taas oo muujinaysa horumar siyaasadeed oo Soomaaliya ka sameyneyso hannaanka dimuqraadiyadeed.
Doorashadan ayaa loo arkaa tallaabo weyn oo dib loogu soo celinayo xuquuqda codbixinta shacabka.
Doorashada maanta ka socota Muqdisho ayaa waxaa ka horyimid siyaasiyiinta mucaaradka.
