Hay’adda Nabad-Sugidda iyo Sirdoonka Qaranka (NISA) ayaa ku dhawaaqday in howlgal qorsheysan oo ka dhacay gobolka Hiiraan lagu dilay toddobo xubnood oo ka tirsan Al-shabaab.
Howlgalka ayaa ka dhacay tuulada Biyo Madoobe ee hoostagta deegaanka Jicibow, halkaas oo saraakiisha NISA ay sheegeen inay sidoo kale burburiyeen gaari xamuul oo lagu raray rasaas fara badan.
NISA ayaa xaqiijisay in Jicibow uu yahay marin istaraatiiji ah oo muddooyinkan ay ciidamada amnigu adkeynayaan si loo yareeyo isku gudubka argagixisada ee u dhexeeya galbeedka iyo bariga Hiiraan.
Sidoo kale NISA ma soo bandhigin sawirrada iyo magacyada dadka ay sheegeen in lagu dilay howlgalkaas.
Maalmihii ugu dambeeyay, Taliska NISA ayaa beegsanayay horjoogayaasha iyo maleeshiyaadka ka tirsan Al-shabaab ee ku dhuumaaleysanaya qeybo ka mid ah dalka.
