Warbixin ay qortay Wakaaladda Wararka ee Reuters ayaa lagu sheegay in hay’adaha amniga ee Liibiya ay sii daayeen in ka badan 200 muhaajiriin ah oo ku xirnaa xabsi qarsoodi ah oo ku yaalla magaalada Kufra, oo ku taalla koonfur-bari Liibiya.
Muhaajiriintan ayaa lagu hayay xaalado bini-aadanimada ka baxsan, sida ay sheegeen laba ilo-wareed oo dhanka amniga ah.
Ilo-wareedyadan oo codsaday in aan magacooda la shaacin ayaa sheegay in ciidanka amnigu ay heleen xabsi dhulka hoostiisa ku yaalla oo qoto dheerkiisu yahay ku dhawaad saddex mitir, kaas oo uu maamulayay nin Liibiyaan ah oo ka ganacsada dadka.
Mid ka mid ah ilo-wareedyada ayaa sheegay in ninkaas weli aan gacanta lagu dhigin.
“Qaar ka mid ah muhaajiriinta la sii daayay ayaa ilaa laba sano ku xirnaa qolalka dhulka hoostiisa ah,” ayuu yiri mid ka mid ah ilo-wareedyada.
Isha kale ayaa sheegtay in waxa ay hawlgalku heleen ay ahaayeen “mid ka mid ah dambiyada ugu xun ee ka dhanka ah bini-aadanimada ee abid laga helay gobolka.”
Hawlgalku wuxuu yimid kadib markii ciidanka amnigu weerar ku qaaday xabsi qarsoodi ah oo ku dhex yaalla magaalada, halkaas oo laga helay dhowr qol oo loogu talagalay xarigga muhaajiriinta, iyadoo xaaladahooda ay aad u xumayd.
Muhaajiriinta la soo badbaadiyay ayaa ka soo jeeda dalalka ka hooseeya saxaraha Afrika, gaar ahaan Soomaaliya iyo Ereteriya, waxaana ka mid ah haween iyo carruur. Magaalada Kufra waxay ku taal bariga Liibiya, qiyaastii 1,700 kiiloomitir u jirta caasimadda Tripoli.
Liibiya waxay noqotay waddo ay sii maraan muhaajiriinta ka baxsanaya colaadaha iyo faqriga ee u socda Yurub, iyagoo adeegsanaya waddooyin halis ah oo dhex mara saxaraha iyo badda Mediterranean-ka tan iyo markii xukunka laga tuuray Mucammar Qadaafi sanadkii 2011. Dhaqaalaha dalka oo ku tiirsan saliidda ayaa soo jiita muhaajiriinta shaqo-doonka ah, balse amniga oo liita ayaa ka dhigaya kuwo u nugul tacaddiyo.
Ugu yaraan 21 meyd oo muhaajiriin ah ayaa laga helay xabaal wadareed ku yaalla bariga Liibiya toddobaadkii hore, iyadoo ilaa 10 qof oo ka badbaaday ay muujiyeen calaamado muujinaya jirdil ka hor afduubkooda, sida ay sheegeen laba ilo-wareed oo amni ah.
Xafiiska xeer-ilaaliyaha guud ee Liibiya ayaa bayaan uu soo saaray Jimcihii ku sheegay in mas’uuliyiinta bariga dalka ay maxkamad u gudbiyeen eedeysane loo haysto xabaal wadareedkaas, kaasoo lagu soo eedeeyay inuu galay xadgudubyo halis ah oo ka dhan ah muhaajiriinta.
Bishii Febraayo sanadkii hore, 39 meyd oo muhaajiriin ah ayaa laga soo saaray ilaa 55 xabaal wadareed oo ku yaal Kufra. Magaaladaas waxaa ku sugan tobanaan kun oo qaxooti Suudaani ah oo ka soo cararay colaaddii ka qaraxday Suudaan sanadkii 2023.
Warbixintan ayaa muujinaysa xaaladda halista ah ee muhaajiriinta ku sugan Liibiya iyo dadaallada amniga ee lagu badbaadinayo noloshooda.
