Magaalada Muqdisho ayaa maanta lagu soo dhoweeyay wafdi sare oo ka socda Qaramada Midoobay, kuwaas oo u yimid dalka ka qeybgalka wadahadallo muhiim ah oo la xiriira xaaladda bani’aadannimo ee Soomaaliya.
Wasiir ku-xigeenka Wasaaradda Arrimaha Dibadda Xukuumadda Federaalka Soomaaliya, Mudane Xasan Maxamed Cali, ayaa wafdiga ku qaabilay Garoonka Diyaaradaha ee Aadan Cadde ee Muqdisho, isaga oo si rasmi ah u soo dhoweeyay.
Wafdigan waxaa hoggaaminaya Tom Fletcher, oo ah Ku-xigeenka Xoghayaha Guud ee Qaramada Midoobay u qaabilsan arrimaha gargaarka bani’aadannimo.
Ujeeddada safarkiisa ayaa ah xoojinta iskaashiga gargaarka, qiimeynta baahiyaha degdegga ah, iyo kor u qaadidda maalgelinta howlaha bani’aadannimo ee dalka.
Soo dhoweynta wafdiga waxaa sidoo kale goobjoog ka ahaa Guddoomiyaha Hay’adda Maareynta Musiibooyinka Qaranka ee SoDMA, Mudane Maxamuud Macalin Cabdulle, oo door muhiim ah ka ciyaara isku-dubbaridka gurmadka iyo ka jawaabidda xaaladaha degdegga ah.
Inta uu socdo safarkiisa oo u dhaxeeya 27-ka Abriil ilaa 1-da May, Mr. Fletcher ayaa lagu wadaa inuu booqasho ku tago magaalada Baydhabo, halkaas oo uu si dhow uga qiimeyn doono xaaladaha bani’aadannimo ee ka jira iyo baahiyaha dadka ay saameeyeen dhibaatooyinka kala duwan.
Safarkan ayaa la filayaa inuu horseedo wada-shaqeyn xooggan iyo taageero dheeraad ah oo caalami ah, xilli Soomaaliya ay weli wajahayo caqabado dhinaca gargaarka iyo samatabbixinta ah.
