Faah faahino dheeraad ah ayaa laga helayaa weerar khasaare culus dhaliyay oo xalay kooxda Al-Shabaab ay ku gashay maqaayada Beach View ee ku taala xeebta Liido.
Weerarka oo ku bilowday qarax Ismiidaamin ah ayaa waxaa xigau dabley Shabaab ah oo Shan gaaraya, kuwaasoo gudaha u galay maqaayada, iyagoo saacado badan halkaasi ka dagaalamayay.
Booliska Muqdisho waxey sheegeen iney soo afjareen weerarka oo ay toogteen Shabaabkii gudaha u galay maqaayada, ma aysan soo bandhigin xadiga khasaaraha iyo sida kooxdaasi ay goobta ku gaartay.
Saraakiisha Caafimaadka ee Isbitaalada Miqdisho ayaa ku warranaya in tirada dhimashada ay gaareyso 30 ruux, halka dhaawucina uu 100 kudhow yahay.
Xiliga weerarka, Xeebta Liido ayaa xalay aad Saxmad u eheyd, maadaama ay eheyd habeen Jimco ay sii baxeyso dadkuna waxa ay ahaayeen kuwo waqti ku qaadanayay jawiga Hawada leh ee Xeebta.
Shabaab oo sheegatay masuuliyada weerarka waxey ku faantay iney xubno dowladda ah leysah, balse khasaaraha goobta ayaa gaaray shacab aan waxba galabsan.
