Wasiirka Arrimaha Dibadda ee dalka Shiinaha, Wang Yi, ayaa bilaabay booqasho rasmi ah oo uu ku marayo dalal ka tirsan qaaradda Afrika, taas oo socon doonta laga bilaabo 7-da ilaa 12-ka Janaayo.
Dalalka uu booqan doono ayaa kala ah Soomaaliya, Itoobiya, Tanzania iyo Lesotho, sida uu Arbacadii ku dhawaaqay afhayeen u hadlay Wasaaradda Arrimaha Dibadda ee Shiinaha.
Wasaaradda Arrimaha Dibadda ee Shiinaha ayaa sheegtay in Afrika ay tahay halka ay wasiirrada arrimaha dibadda ee Shiinaha u safraan bilowga sannadka cusub muddo 36 sano oo xiriir ah, arrintaas oo muujinaysa muhiimadda ay Beijing siinayso xiriirka Afrika.
Wang Yi, oo sidoo kale xubin ka ah Xafiiska Siyaasadda ee Guddiga Dhexe ee Xisbiga Shuuciga ee Shiinaha, ayaa ka qeyb geli doona xafladda furitaanka Sannadka Xiriirka Shiinaha iyo Afrika, taas oo ka dhici doonta xarunta Midowga Afrika ee Addis Ababa.
Booqashada Wasiirka Arrimaha Dibadda ee Shiinaha uu ku tagayo Soomaaliya ayaa ah tii ugu horreysay ee wasiir arrimo dibadeed oo Shiinaha ah uu ku yimaado Muqdisho tan iyo sanadihii 1980-meeyadii.
Safarkan ayaa la filayaa inuu Soomaaliya siiyo taageero diblomaasiyadeed, kaddib markii Israa’iil ay bishii hore noqotay dalkii ugu horreeyay ee si rasmi ah u aqoonsada maamulka Somaliland.
Shiinaha ayaa mar kale caddeeyay taageerada uu u hayo midnimada iyo madax-bannaanida Soomaaliya, isagoo doonaya inuu xoojiyo saameyntiisa istaraatiijiyadeed ee ku teedsan Gacanka Cadmeed, marin muhiim u ah ganacsiga Shiinaha ee mara Badda Cas iyo Kanaalka Suweys kuna wajahan suuqyada Yurub.
Dhinaca kale, booqashada Wang Yi ee Tanzania ayaa salka ku haysa dadaalka Shiinaha ee ah inuu helo marin uu ku gaaro khayraadka macdanta, gaar ahaan naxaasta Afrika.
Shirkado Shiineys ah ayaa dib u dayactir ku wada tareenka TAZARA oo mara Tanzania kuna xirma Zambia.
Wasiirka ayaa sidoo kale booqan doona boqortooyada Lesotho, halkaas oo Shiinuhu doonayo inuu ku muujiyo doorkiisa ku aaddan taageerada ganacsiga xorta ah.
Sanadkii hore, Shiinaha ayaa dalalka ugu saboolsan dunida u furay suuqgiisa oo gaaraya $19 trillion iyada oo aan canshuur lagu soo rogin, taas oo uu ballanqaaday Madaxweyne Xi Jinping shirkii Shiinaha iyo Afrika ee 2024 ka dhacay Beijing.
Lesotho ayaa ka mid ah dalalkii ugu saameynta badnaa canshuurihii adkaa ee uu Maraykanku saaray sannadkii hore, kuwaas oo gaaray ilaa 50% badeecadaha ay u dhoofiso Mareykanka.
Socdaalka Wasiirka Arrimaha Dibadda ee Shiinaha uu ku imaanayo magaalada Muqdisho ayaa ku soo aadaya xilli xasaasi ah, iyadoo shalay Wasiirka Arrimaha Dibadda ee Israa’iil uu booqasho ku tagay magaalada Hargeysa, arrintaas oo sii xoojisay xiisadda diblomaasiyadeed ee ka dhalatay aqoonsiga ay Israa’iil siisay Somaliland.
