Xildhibaan Cabdiraxmaan Maxamed Xuseen (Odowaa) ayaa si rasmi ah ugu dhawaaqay inuu iska casilay xilkii Xoghayaha Guud iyo xubinnimadii uu ka hayay xisbiga Xisbiga Caddaaladda iyo Wadajirka (JSP), sida ku cad warsaxaafadeed uu soo saaray maanta oo taariikhdu tahay 25 March 2026.
Odowaa ayaa sheegay in go’aankiisa iscasilaadeed uu salka ku hayo khilaaf siyaasadeed oo muddo soo jiitamayay oo kala dhaxeeyay guddoomiyaha xisbiga, isla markaana ah Madaxweynaha Soomaaliya Xasan Sheekh Maxamuud.
Wuxuu xildhibaanku si faahfaahsan u tilmaamay dhowr qodob oo uu ku saleeyay go’aankiisa, kuwaas oo ay ka mid yihiin eedeymo la xiriira in madaxweynuhu talada dalka iyo tan xisbiga ku koobay gacantiisa, isla markaana uusan tixgelin siin aragtiyada ka duwan tiisa.
Sidoo kale, Odowaa ayaa si adag uga horyimid habka wax-ka-beddelka dastuurka dalka, isagoo ku tilmaamay mid sii kala fogeynaya bulshada Soomaaliyeed isla markaana wax u dhimaya mabaadi’da federaalka.
Arrimaha kale ee uu carrabka ku adkeeyay waxaa ka mid ah nidaamka doorashooyinka dalka, halkaas oo uu sheegay in madaxweynuhu doonayo hannaan uu natiijadiisa xakameyn karo, halka isaga uu aaminsan yahay in doorashooyinka lagu saleeyo heshiis siyaasadeed oo loo dhan yahay.
Dhanka kale, wuxuu dhaliilay waxa uu ugu yeeray burburinta dowlad-goboleedyada dalka, isagoo ku tilmaamay in ay yihiin tiir muhiim u ah nidaamka federaalka iyo midnimada ummadda Soomaaliyeed.
Xildhibaan Odowaa ayaa sidoo kale cambaareeyay xannibaadaha lagu hayo xildhibaannada iyo muwaadiniinta, gaar ahaan in xildhibaan leh xasaanad laga hor istaago safar, taas oo uu ku tilmaamay xadgudub sharci iyo mid ka dhan ah madax-bannaanida baarlamaanka.
Odowaa wuxuu sheegay inuu qaadi doono jiho siyaasadeed cusub, isla markaana uu la shaqeyn doono cid kasta oo ay ka mideysan yihiin ilaalinta midnimada iyo mabaadi’da Soomaalinimada.
Is-casilaaddan ayaa kusoo beegmaysa xilli ay cirka isku sii shareerayaan khilaafaadka siyaasadeed ee dalka, waxaana la filayaa inay saameyn ku yeelato jihada siyaasadeed ee xisbiga JSP iyo guud ahaan siyaasadda Soomaaliya.
