Madaxweynaha dowladda Federaalka Soomaaliya, Xasan Sheekh Maxamuud, ayaa si adag uga hadlay suurtagalnimada in ciidamo ka socda Israel la geeyo Waqooyiga Soomaaliya, isaga oo ku tilmaamay arrintaasi mid khatar ku ah madaxbannaanida iyo midnimada dalka.
Madaxweynaha ayaa sheegay in Dowladda Federaalka Soomaaliya aysan marnaba aqbali doonin faragelin shisheeye oo lagu sameeyo dhulka Soomaaliyeed, gaar ahaan mid militari, taasoo wax u dhimaysa amniga iyo qarannimada dalka.
“Dalkayagu waa mid xor ah, lehna madax-bannaani buuxda. Haddii Israel ama cid kale ay isku daydo inay ciidamo keento Waqooyiga Soomaaliya, waan iska difaaci doonnaa, waanan la dagaallami doonnaa inta awoodeenna ah,” ayuu yiri Madaxweyne Xasan Sheekh.
Sidoo kale, Madaxweynaha ayaa ugu baaqay beesha caalamka inay ixtiraamaan midnimada iyo madax-bannaanida Soomaaliya, isla markaana ay ka fogaadaan tallaabooyin keeni kara xasillooni-darro cusub.
Hadalkan ayaa imanaya xilli ay taagan yihiin dooddo la xiriira xiriirka dibadda iyo xaaladda siyaasadeed ee gobollada Waqooyi, taasoo weli ah mid xasaasi ah.
