Ciidamada Dowladda Federaalka Soomaaliya iyo kuwa Jubbaland ayaa gaaray deegaanada dhanka woqooyi kaga beegan degmada Jamaame ee gobolka Jubbada Hoose, iyagoo kaabiga ku haya magaalada oo muddo dheer xarun u ah maleeshiyaadka Al-Shabaab.
Arrintan ayaa ka dambeysay kadib markii howlgallo cir iyo dhul ah oo qorsheysan ay ciidamada isbahaysan ka fuliyeen tuulooyin dhowr ah oo hoos yimaada Jamaame. Duqeymo culus oo ay ka qeyb qaateen saaxiibada caalamka ayaa lagu burburiyay saldhigyo ay Al-shabaab ka samaysteen deegaanada Muuse Xaaji, Araare, Koban, Bangeeni, Maleyleey, Baladu-raxma iyo Degeyga Maam-bile.
Wararka ka imaanaya goobaha howlgalka ayaa xaqiijinaya in la burburiyay fariisimo istaraatiiji ah oo Khawaarijtu halkaas ku lahayd, waxaana la dilay horjoogayaal muhiim u ahaa kooxda, halka tiro kale la dhdhaawacay.
Sidoo kale waxaa la qabtay rag maxaabiis ah oo u qaabilsanaa miinooyinka iyo qaraxyada Al-Shabaab, islamarkaana waxaa la fashiliyey miinooyin dhowr ah oo lagu diyaariyay waddooyinka ay isticmaalaan shacabka.
Saraakiisha hoggaaminaysa howlgalka ayaa sheegay in weli howlgalo ay ka socdaan duleedka degmada Jamaame.
Wararka ayaa sheegaya in culeys weyn uu soo food saaray maleeshiyaadka Al-shabaab ee ku sugan degmada Jamaame ee Gobolka Jubbada Hoose.
