War saxaafadeed ayaa laga soo saaray shirka Golaha mustaqbalka Soomaaliyeed ee Mucaaradka oo ay ku mideysan yihiin maamulada Jubbaland iyo Puntland iyo Madasha Samatabixinta Soomaaliyeed, kaasi oo maalmahan ka socday magaalada Kismaayo.
Shirka Kismaayo ayaa laga soo saaray 17 qodob oo looga hadlay xaalada Siyaasadeed uu xiligan marayo dalka, gaar ahaan amniga, Dhaqaalaha, doorashooyinka iyo wax ka badalka lagu sameeyay Dastuurka dalka.
Golaha Wadatashiga ayaa ku hanjabay in ay qabsan doonaan doorasho haddii muddo bil gudaheed ah uu wada hadal furi waayo Madaxweynaha Soomaaliya Xasan Sheekh.
“Madaxweynuhu hadduu muddo bil ah ku furi waayo wada-hadal doorasho… waxa goluhu diyaarinayaa doorasho uu dalka ka qabanayo.”
Golaha Mustaqbalka “Doorashada Banaadir waa mid hal koox wadato.. heshiisna laguma aha maqaamka caasimad.”
Shirweynaha aayo-katashiga Soomaaliyeed oo ay isugu yimaadeen Golaha Mustaqbalka Soomaaliyeed, mudanayaal ka tirsan labada Gole ee Baarlamaanka Federaalka Soomaaliya, Siyaasiyiin horay xilal kala duwan uga soo qabtay Dalka iyo qaar ka mid ah ururada bulshada rayidka ah, ayaa isku raacay in Madaxweynuhu uu dayacay ammaankii Dalka, isagoo gebi ahaanba joojiyey dagaalkii lagula jiray argagixisada Al-shabaab, ciidankii xoogga Dalkana u loogay cadowga.
