Taliska Ciidanka Booliska Maamulka Somaliland ayaa war ka soo saaray dhacdo la xiriirta qoys u dhashay dalalka Suuriya iyo Yemen oo lagu eedeeyay in jir-dil loogu geystay magaalada Hargeysa, iyagoo sheegay in si degdeg ah tallaabo looga qaaday askartii falkaasi lagu eedeeyay, islamarkaana uu socdo baaritaan dheeraad ah.
Taliska Ciidanka Booliska Somaliland waxa uu caddeeyay wararka lagu baahiyay baraha bulshada ee la xiriira nin u dhashay dalka Suuriya oo muuqaallo ku faafiyay baraha bulshada, kana cabanayay qaabkii loo qabtay.
Boolisku waxa ay xaqiijiyeen in ninkaasi ay Maxkamadda Degmada Hargeysa u soo jartay waaran qabasho ah.
Si kastaba ha ahaatee, Taliska Ciidanka Booliska Maamulka Somaliland ayaa muujiyay sida ay uga xun yihiin qaabka ay wax u dhaceen intii uu socday howlgalkaasi. Waxa ay sheegeen in si degdeg ah tallaabo looga qaaday askartii falkaas samaysay, isla markaana uu socdo baaritaan lagu ogaanayo faahfaahinta dhacdada.
Taliska Booliska Somaliland ayaa ku adkeeyay in ay ka go’an tahay ilaalinta sharciga, dhowrista xuquuqda muwaadiniinta iyo dhammaan dadka ku sugan deegaannada uu ka taliyo, si waafaqsan dastuurka iyo xeerarka u yaalla.
