Taliska La-dagaalanka Argagixisada ee Ciidanka Booliiska Soomaaliyeed ayaa faahfaahin ka bixiyay howlgal qorsheysan oo loogu magac daray “WAABARI” oo laga fuliyay deegaanka Jambaluul ee gobolka Shabeellaha Hoose, kaas oo lagu beegsaday maleeshiyaad ka tirsan Al-Shabaab.
Howlgalka oo dhacay 18-ka Abriil 2026, abaaro 9:00 subaxnimo, ayaa waxaa si wadajir ah u fuliyay Ciidanka Gaarka ah ee La-dagaalanka Argagixisada iyo qeybta Baarista Dembiyada (CID), kadib markii la helay xog sirdoon oo muujineysay dhaqdhaqaaqyo ay kooxdaasi ka wadeen deegaanka Jambaluul.
Ciidamada ayaa ku guuleystay inay burburiyaan bar kontorool iyo xarun ay maleeshiyaadkaasi uga qaadi jireen lacagaha baadda ah dadka rayidka ah, kuwaas oo ay ugu yeeri jireen “sakawaat”. Goobtaasi ayaa la sheegay inay ahayd meel muhiim u ah dhaqaalaha kooxda.
Intii uu socday howlgalka, ciidamada ayaa dilay horjooge ka tirsanaa kooxda oo lagu magacaabi jiray Zakariye, kaas oo mas’uul ka ahaa jarista boonooyinka lagu qaadi jiray lacagaha baadda ah. Sidoo kale, waxaa lagu dhaawacay laba xubnood oo kale oo kala ah Xasan Cabdiraxmaan oo ahaa mas’uulka deegaanka Jambaluul iyo nin kale oo lagu magacaabo Geele.
Warbixinta ayaa sidoo kale xustay in ciidamada ay goobta ka heleen caddeymo muhiim ah oo ay ka mid yihiin boonooyinkii lagu qaadi jiray lacagaha, hub kala duwan iyo mooto uu lahaa horjoogaha la dilay.
Taliska Booliiska Soomaaliyeed ayaa sheegay in howlgalka “WAABARI” uu qeyb ka yahay dadaallada joogtada ah ee lagu wiiqayo awoodda kooxaha argagixisada, laguna xaqiijinayo amniga shacabka ku nool gobolka Shabeellaha Hoose iyo guud ahaan dalka.
Ugu dambeyn, taliska ayaa ugu baaqay shacabka inay la shaqeeyaan hay’adaha ammaanka, si loo xoojiyo la dagaalanka kooxaha argagixisada loona sugo nabadda iyo xasilloonida dalka.
