Xukuumadda Somaliland ayaa si cad uga jawaabtay hadallo ka soo yeeray dowladda Iran, iyadoo sheegtay in go’aamada ku saabsan isbaahaysigeeda iyo xiriiradeeda caalamiga ah ay si madax-bannaan u gaarto.
Qoraal rasmi ah oo ka soo baxay Wasaaradda Arrimaha Dibadda Somaliland ayaa lagu sheegay in Somaliland ay tahay dal dimuqraadi ah oo xasilloon, waa sida ay hadalka u dhigeen, isla markaana ku hawlan nabad, horumar iyo iskaashi caalami ah.
Waxa kale oo lagu xusay in cid kasta oo ay la samaysanayso xiriir ama isbaahaysi ay iyadu go’aansanayso, iyadoo aan la aqbalayn wax faragelin dibadeed ah.
Somaliland ayaa sidoo kale carrabka ku adkaysay in xiriirka ay la leedahay Israel uu yahay mid adag oo aan la wiiqi karin, taasoo muujinaysa jihada siyaasaddeeda arrimaha dibadda.
Dhanka kale, fariintan ayaa si toos ah loogu wargeliyay Madaxweynaha Mareykanka Donald Trump, taasoo muujinaysa muhiimadda ay Somaliland siinayso xiriirka ay la leedahay hoggaamiyeyaasha caalamka.
Hadalkan ayaa imaanaya xilli ay sii xoogaysanayaan doodaha ku saabsan xiriirada cusub ee siyaasadeed iyo isbaahaysiyada gobolka, iyadoo Somaliland ay muujinayso inay doonayso inay door muuqda ka ciyaarto siyaasadda caalamiga ah.
