Dowladda Masar ayaa sheegtay muhiimadda ay leedahay in la helo maalgelin joogto ah oo ku filan si loo taageero howlgalka Midowga Afrika ee taageerada iyo xasillinta Somalia ee AUSSOM, si ay ciidamadaasi u gutaan waajibaadkooda amni.
Wasiirka Arrimaha Dibadda Masar, Badr Abdelatty, ayaa carrabka ku adkeeyay baahida loo qabo in la dardargeliyo taageerada dhaqaale ee howlgalka AUSSOM, xilli ay jirto walaac la xiriira kharashaadka howlgalka.
Masar ayaa sidoo kale muujisay walaac ku saabsan baahida dhaqaale ee howlgalka Midowga Afrika, iyadoo Guddoomiyaha Guddiga Midowga Afrika, Mahmoud Ali Youssouf, uu hore u sheegay in howlgalka AUSSOM uu u baahan yahay ku dhawaad 190 milyan oo doolar si uu si hufan ugu shaqeeyo.
Wasiirka Arrimaha Dibadda Masar ayaa sidoo kale tilmaamay in dalkiisa uu xoojin doono iskaashiga iyo wada shaqeynta kala dhaxeysa Soomaaliya, si loo taageero amniga iyo xasilloonida gobolka Geeska Afrika iyo Badda Cas.
Howlgalka cusub ee Midowga Afrika ee Soomaaliya ee AUSSOM ayaa si rasmi ah u billowday bishii Janaayo 2025, kadib markii Golaha Ammaanka ee United Nations uu ansixiyay bishii Diseembar 2024.
