Taliyaha Ciidanka Xoogga Dalka Soomaaliyeed S/Guuto Ibraahim Maxamed Maxamuud ayaa gaaray magaalada Baydhabo ee xarunta Gobolka Baay.
Ujeedka safarka Taliyaha Ciidanka XDS, Gen. Ibraahim Maxamed Maxamuud uu ku tagay magaalada Baydhabo ayaa ahaa sidii loo dardargelin lahaa howlgalada ka dhanka ah Khawaarijta, iyo adkeynta amniga deegaanada Koonfur Galbeed Soomaaliya.
Kulamo ayaa la filayaa inuu la qaato madaxda ugu sarreysa maamulka Koonfur Galbeed si loo xoojiyo amniga magaalooyinka waaweyn iyo waddooyinka isku xira gobolada.
Safarkan ayaa ku soo beegmaya xilli Ciidanka Xoogga Dalka ay kordhiyeen howlgalada ka dhanka ah kooxaha argagixisada ee gobolada Baay iyo Bakool, iyadoo dhowaan ciidamadu ay guulo ka gaareen furista waddooyinka istiraatiijiga ah iyo baabi’inta fariisimaha khawaarijta.
Taliska Ciidanka XDS ayaa lagu wadaa inuu saacadaha soo socda faahfaahin dheeri ah ka bixiyo kulamo gaar ah oo taliyuhu la yeelan doono qeybaha kala duwan ee bulshada iyo maamulka deegaanka.
