Dowladda Uganda ayaa shaacisay inay Soomaaliya u soo direyso cutub cusub oo ka tirsan ciidamadeeda, kuwaas oo qeyb ka noqon doona howlgalka Midowga Afrika ee AUSSOM ee taageera amniga Soomaaliya.
Ciidamadan ayaa tababarro la xiriira ilaalinta shacabka, la dhaqanka bulshada iyo howlaha nabad ilaalinta loogu soo gabagabeeyay magaalada Kampala, ka hor inta aan loo soo daabulin Soomaaliya.
Taliyaha Qaybta 1-aad ee Ciidamada Lugta Uganda, Sarreeye Guuto Fred Mwesigye, ayaa ciidamada cusub kula dardaarmay inay muujiyaan anshax, wada shaqeyn iyo xirfad sare inta ay ku guda jiraan howlgalka Soomaaliya.
Taliyuhu wuxuu sheegay in ciidamada laga filayo inay door muuqata ka qaataan sugidda amniga iyo la dagaallanka Al-Shabaab, gaar ahaan gobollada Shabeellada Hoose iyo Shabeellada Dhexe.
Waxa uu sidoo kale ammaan u jeediyay qaar kamid ah ciidamada Uganda ee hore uga qeyb qaatay howlgalka loo bixiyay “Operation Silent Storm”, kaas oo laga fuliyay gobolka Shabeellada Hoose.
Uganda ayaa ah dalka ugu badan ee ciidamada ku leh howlgalka AUSSOM, iyadoo ciidamadeedu door muhiim ah ka qaataan howlaha amniga, tababarrada ciidamada Soomaaliyeed iyo dagaalka ka dhanka ah Al-Shabaab.
Soo dirista ciidamadan cusub ayaa ku soo aadeysa xilli howlgalka AUSSOM uu wajahayo caqabado dhaqaale, kaddib markii qaar kamid ah deeq bixiyeyaasha caalamiga ah ay yareeyeen taageeradii ay siin jireen howlgalka. Dhanka kale, Uganda waxay sii waddaa beddelka iyo xoojinta ciidamadeeda ku sugan Soomaaliya si loo adkeeyo dadaallada lagu sugayo amniga dalka.
